عذراً حبيبتي ..

سيدةُ الكونِ بأكمله .. 

ما عادَ اللقبُ يناسبُكِ ..
قد زادت بالكونِ حروبٌ و امتلأ بضجيجِ رصاص ..
أحبك مهما يعلو القصفُ و مهما حَطَم كل أساس..
 أحبك مهما اشتدَ العرضُ و مهما انحبست أنفاس .. 
أحبك مهما أصابَ النفسَ ومهما انحدر الاحساس..
 قد صارت إنسانيتنا عاراً و بشريتنا تحت مداس .. 
عذرا إذا يوماً سميتك سيدة الناس .. 


بقايا البشر قد هبوا بقبحهم .. 
و مازلتِ أنتِ بكل الجمال تتفردين ..
 و جينات الظلم قد سادت .. و كُتِب على جبهات الحاقدين .. 
" نحن أناس قد ماتت ضمائرنا و تجبرنا ..
و فاق طغياننا فوق العالمين " .. 
و أنتِ ملاكٌ ..
 لا حول لكِ ولا قوةٍ ..
 فلمَ بين الضباع تعيشين ؟! ..
 حبيبتي لنبحث أين تسكن الملائكة ؟! ..
 و من أين شردتِ إلي هذا الكون اللعين ؟ ..

اعتذر إن كان اعتذاري يفيد .. 
 اعتذر و اعتذر و اعتذر من جديد ..
 لقد تشبثت بكِ كطفلٍ خائفٍ أن تنساه أمه وسط السوق ..
 كفتاةٍ يحاوطها الذئاب و ينهشُ لحمها من يروق .. 
كدراجةٍ تنحدر من فوق جبلٍ ولا تعرف نهايتها ..
 و تخشى من حجارة تعوق.. 
 أنانيٌ .. 
رغبت منك النجاة ..
 أردت من شفتاكِ قبلة الحياة ..
 و طمعت لو تصنعي لي مصلا .. 
وتبقى إنسانيتي أصلا ..
 إذ يجري ما أتاني منكِ في الوريد .. 
اعتذر إليكي سيدتي إن كان اعتذاري يفيد ..
 
 مشغولٌ عنكِ ..
 مهمومٌ و همومي رادعة ..
 قد زات من هول المحن ..
 عذراً على كلماتي الموجعة .. 
فهذا خلاصة ذاك الوطن ..
 و تلك ما تبقى لقصيدة رومانسية .. 
بعد ما صنعوا للانحطاط وثن ..
 يعبدونه من دون ضمائرهم ..
 و يتقربون إليه بالقرابين ..
 يهشمون الانسانية التي بداخلهم .. 
و ينشرون الهوان باسم هذا الدين ..
 يزرعون الظلم في كل ارضٍ ..
 وسيحصدون ثورةً ولو بعد حين .. 
 هذا جزاء ما صنعته ايديهم ..
 وهذا مصير الأولين .. 
انظرواإليكِ نهاية من تجبروا ..
 و من تأسدوا .. 
و من رضخ للمتأسدين .. 
ترى النهاية مفزعة ..
و علاماتها ساطعة ..
آتيةٌ لا ريب فيها ..
آتيةٌ تعتذر إليكِ   ..
آتيةٌ تحرر ذاك الوطن ..
فتحضّروا لدفع الثمن ..

اشتراكيتنا " رؤية الاشتراكيين الثوريين " 

                 الرأسماليين : عايزين رأسمالية أكتر

 

            عن كتاب الاشتراكية التي ندافع عنها - اصدار مركز الدراسات الاشتراكية مارس 2006

 

 رملة بولاق و أبراج ساويرس 

دايما الرأسماليين المصريين بيقولوا أن مشكلة مصر أنها مش دولة رأسمالية بما فيه الكفاية وأنها محتاجة تبقى رأسمالية أكتر عشان مشاكلها تتحل ! و كمان لسة مش كل المصانع و الشركات و الخدمات تم خصخصتهم ، وسيطرة الرأسمالية على كل رأس المال في الدولة ماحصلش لسة .. صبرك شويا .

طبعا لازم نعرف هما بيشتكوا من إيه؟ هما عايزين كل حاجة في الدولة تتباع وتبقى في ايد رجال الاعمال يعني من الاخر تتباع ليهم ، حتى عايزين يشتروا مؤسسات مسئولة عن منتجات و خدمات أساسية وما تبقاش ملك الدولة زي المياة و الكهرباء و الغاز و التليفونات و السكك الحديدية و غيرهم ، عايزين بيع كل الشركات و المصانع العامة بتاعت الحكومة ليهم ، ببساطة هما عايزين يحولوا كل شئ حتى " الناس " نفسهم لمجرد سلعة يبيعوا و يشتروا فيهم بدون اي مشاكل تواجههم أو رقابة أو حتى رفض شعبي .

الفكرة اللي عايزين يقنعونا بيها هي أن السياسة دي اللي اسمها " الليبرالية الجديدة " أو " العولمة " أو " السوق الحر " لو حصلت بشكل أكبر و اتباعت كل الشركات و المصانع و الخدمات العامة ده هيشجع الرأسماليين المصريين و الاجانب  للاستثمار اكتر و الاقتصاد بتاعنا هيبقى قوي و هتقل البطالة و ترتفع الاجور و العيشة في مصر تنتعش ، و منطقهم في كدة أن كل ما الرأسماليين هتزيد فلوسهم أكتر كل ما الفقراء اللي طالع عينهم هتزيد فلوسهم أكتر !

اصحاب المنطق ده هما اللي كانوا مسيطرين على السلطة في مصر في عهد المخلوع و لسه مسيطرين عليها في عهد الاخواني مرسي و مسيطرين على كل سلطة في العالم . حكومات مبارك فضلت تخصص المصانع و الخدمات لعشرات السنين و فضل الدعم اللي كان بيفيد الناس الغلابة يقل نسبيا سنة ورا سنة ، و بدأت الاسعار تتحدد على حسب العرض و الطلب فزادت الاسعار بشكل بشع و طبعا فكرة توظيف الخريجيين في المصالح و المؤسسات الحكومية دي حاجة بقينا بنسمع عنها في الافلام العربي القديمة و التعليم المجاني مابقاش مجاني بأي شكل من الاشكال ارتفعت مصاريفه بسبب انخفاض الدعم وصلت لألاف ده غير ظهور مافيا الدروس الخصوصية و ارتفاع اسعار الكتب المدرسية و الجامعية و ظهور الجامعات الخاصة و المدارس الاجنبية الخاصة اللي بدأت ناس كتير تتوجه ليه وتسيب تعليم الحكومة و طبعا ظهرت المستشفيات الاستثمارية الغالية و غيرهم حاجات كتير ، يعني ببساطة سياسات " السوق الحر " اللي هي كل واحد يعمل اللي هو عايزه بأي شكل و بأي ثمن بغض النظر عن مصالح المجتمع هي اللي بقيت سايدة ،  فيا ترى ايه كانت النتيجة ؟

أكيد كل واحد عايش في البلد يعرف ايه كانت النتيجة ؟ كانت نتيجة ثورة ضد الفساد و الظلم و الاستغلال ، ثورة من أجل العيش و الحرية و العدالة الاجتماعية و الكرامة الانسانية بعد ما الاسعار بقيت نار و البطالة وصلت لأعلى معدلاتها و مستوى الفقر وصل لشكل غير مسبوق ، و نسبة التجار الصغيرين اللي فلسوا وصلت لنسب فلكية ، مشاكل ارهابية و فتن طائفية و استمرت ديكتاتورية مبارك بتقمع و تسجن أي حد ممكن يقرب من مصالح مجموعة صغيرة اوي من الرأسماليين اللي واكلين البلد ولسة لغاية دلوقتي بياكلوها و مرسي طبعا عامل و هيفضل يعمل نفسه مش من هنا لأن اعضاء بارزين في جماعة الاخوان المسلمين هما ناس من اللي واكلين البلد زي مثلا خيرت الشاطر و حسن مالك و غيرهم كتير .

الليبرالية الجديدة و عايزين رأسمالية أكتر عمرها ما كانت الحل عشان تقلل مشكل الناس و تنقذ مريض من الموت ! بالعكس الليبرالية الجديدة كانت سبب في زيادة المصيبة اللي حولة الازمة لكارثة انفجرت في شكل ثورة و برغم كل ده دولة الاخوان لسة ماشية على نفس السياسات اللي الناس خرجت ضدها أيام المخلوع .

في التدوينات الجاية هنتعرف اكتر على شكل الليبرالية الجديدة و سياساتها اللي مصر لسة ماشية عليها .  

  تدوينات لها علاقة بنفس الموضوع : 

  اشتراكيتنا " رؤية الاشتراكيين الثوريين "  الحكام:أنتم السبب في فقركم يا فقراء 

                                                         اضغط هنا

 للتعرف على الاشتراكية الثورية بالعامية المصرية .. الاشتراكية الثورية .. ببساطة  
                                                                  اضغط هنا

   

اشتراكيتنا " رؤية الاشتراكيين الثوريين " 

                 الحكام: أنتم السبب في فقركم يا فقراء

            عن كتاب الاشتراكية التي ندافع عنها - اصدار مركز الدراسات الاشتراكية مارس 2006

 

دايما رجال السلطة سواء في عهد المخلوع مبارك أو في عهد الاخواني مرسي اللي ماشي على نفس سياسات مبارك الرأسمالية الفاشلة اللي قامت بالأساس ضدها الثورة عندهم رد بسيط جدا على الكساد و الفقر و البؤس اللي الناس عايشين فيه وهو أن الناس دي أصلا جاهلة ومعندهاش وعي عشان كدة بيخلفوا كتير وبيجيبوا عيال مش بيقدروا يصرفوا عليهم وبيسببوا زيادة سكانية بتدمر البلد و مواردها ، و برغم مجهودات الحكومة العظيمة مش بتلاحق على مشاكلهم دي .

التفسير ده مش جديد على فكرة ، فيه عالم اقتصاد مشهور اسمه " توماس مالتوس " قعد طول حياته يدافع عن نظريته اللي بتقول أن السكان بيزيدوا بشكل كبير و الموارد في العالم  كله بتقل ولو سكان العالم ما بطلوش يزيدوا كدة ، هتحصل كوارث و مجاعات !  و طبعا الكلام ده مقنع جدا ، ويمكن تكون انت نفسك اقتنعت بيه و لكن أحب اقولك أن الكلام ده مجرد تدليس و ضحك على العقول .

مفيش شك أن الموارد في مصر وفي العالم كله محدودة بس فيه حاجة كمان موجودة اسمها التكنولوجيا ، والتطور التكنولوجي في العالم وخاصة الدول المتقدمة فاق كل الحدود لدرجة أن باستخدام التكنولوجيا دي فيه دول قدرت تحقق نمو في اقتصادها أكتر بكتير من نموها السكاني ، فلو فرضنا أن النمو السكاني في مصر 3 % - رغم أنه كان في 2005 ما وصلش 2% حتى -  بس خلونا نفترض ، فلو كان نمونا الاقتصادي 10% سنويا أكيد هنقدر نسد احتياجات البشر من أكل و ملبس و مسكن و تعليم و صحة و غيرهم من احتياجات و هيكون كمان فيه فائض .

ولكن عشان يكون فيه اقتصاد بينمو بشكل مستمر و لفترة طويلة في ظل وجود النظام الرأسمالي بكوارثه و انهياراته و هشاشته اللي من سنة للتانية بيحصل بسبب سياساته كارثة تسقط اقتصاد العالم كله فتقريبا مستحيل ده يحصل تماماً .

الدافع الأول في النظام الرأسمالي هو تحقيق الربح للرأسماليين مش تلبية احتياج البشر ، و أي رأسمالي في الدنيا بيشغل فلوسه و بيأنتخ في مكتبه المكيفعشان ياخد فلوس أكتر مش عشان إسعاد البشرية ، و عشان كدة مش هتلاقي الرأسمالي مهتم أوي بأنه ينتج أدوية لعلاج أمراض الكبد عشان فقراء أفريقيا لأتهم مش معاهم فلوس الدواء أو لأنها هتسكبه ملاليم مقارنة باستثمارات أخرى ، ولكن الرأسمالي مهتم جدا في الاستثمار في مجال مستحضرات التجميل بأسعار عالية و ماركات عالمية عشان سيدات الطبقات الغنية في العالم و ده اللي بيسميه الاقتصاديين " الطلب الفعّال " اللي هو الطلب اللي صاحبه يقدر على ثمنه .

الاستماتة من أجل تحقيق الربح بأي شكل من الأشكال هي الصفة المميزة للنظام الرأسمالي لدرجة بتوصل لأن الرأسماليين دايما بيبحثوا عن أي طريقة لتقليل تكاليف الانتاج عشان يزيد عندهم صافي الربح و ده طبعا عمره ما هينفع يحصل غير من خلال استغلال العمال و مص دمهم . الرأسماليين بينفسوا بعض بشراسة لدرجة أنه ممكن يخلي رأسمالي اخر يفلس و يسرح العمال اللي عنده اللي مالهمش أي ذنب ولكن التنافس الوحشي " المطحنة " هو أحد صفات النظام الرأسمالي .و طبعا نتيجة حروب الموت و تكسير العظام للي بين الرأسماليين دي يوميا .. ده بيؤدي بعد تراكمه لانهيارات و كوارث في الاقتصاد العالمي واللي بيقع في النهاية على اكتاف الطبقات الفقيرة اللي قوتها الاقتصادية مش بتتحمل انهيارات قوية زي دي .

و عشان مصر دولة رأسمالية فكل ده بيحصل فيها وهو ده السبب الحقيقي للفقر و البؤس و المعاناة اللي عايش فيها اكتر من نص الشعب و ده كان سبب الازمة الاقتصادية اللي عدت على مصر سنة 1998 لما المستثمرين في العقارات قعدوا يموتوا بعض في السوق و يشوفوا مين هيقدر يبني مدن جديدة و عقارات و ابراج و عمارات فخمة أكتر لغاية ما بقى العرض اكتر بكتير من الطلب و كمان العرض كان أعلى بكتير من القدرة الشرائية اللي عند المحتاجين لمساكن فعلا فحصل ركود و كساد في سوق العقارات و انهيار في المجال ده و المستثمرين فلسوا و ماقدروش يسددوا ديونهم للبنوك فكانت النتيجة أن بعضهم هرب بدون تسديد و التانيين أدعوا تسديد الديون من خلال رشاوي و تزوير مع رؤساء بعض البنوك اللي بعد كدة تم فضحهم في السنين اللي بعدها .

طبعا لازم نكون عارفين أن مصر دولة متأخرة اقتصاديا ، يعني دولة مستهلكة مش منتجة لسة ما وصلش التطور الاقتصادي فيها إى أنها تدخل في حلبة المنافسة الرأسمالية العالمية و ده بيزود علينا المشكلة لأننا مش بنخسر بس و بيحصل عندنا ركود و كساد بيؤدي لفقر ناس كتير ! لأ ، ده احنا كمان بنتأثر بشكل بشع بخسارة اقتصاد دول منتجة و مستثمرة أخرى ، و اقتصادنا لا عارف يتطور ولا عارف يدخل المنافسة العالمية .

و عشان كدة دايما الرأسماليين و اعوانهم من رجال السلطة ممكن يعملوا أي حاجة وحشة و بلا انسانية عشان خاطر بس يقدروا موجودين و واقفين على رجليهم ، أو عشان خاطر بس يقدروا يدخلوا في حلبة المنافسة بدل ما هما بينضربوا من برة و محدش سامع عنهم و ارباحهم مش زي أرباح الشركات العالمية ، و للاسف هما فاكرين انهم كل ما هيطحنوا في العمال أكتر هيكبروا اكتر و يقدروا يوصلوا للمنافسة العالمية  و ده طبعا في ظل فشل الاقتصاد المصري و تراجعه و الانخفاض الشديد للقوة الشرائية أو القدرة على الشراء عن أغلب الناس مستحيل هيحصل ... !!

وحتى لو مصر تطورت و حصل فيها نهضة و بقيت زي الصين أو سنغافورة فالتجربة اثبتت أن دول دي مهما كان نمو اقتصادها سريع و منتعش على طول لفترة طويلة ولكنها ممكن تسقط تماما لو تعرضت لسلسلة من الازمات الاقتصادية العالمية و المحلية ورا بعض و كل اللي حققته الدول دي في عشرات السنين ممكن يسقط  في ثانية واحدة زي ما حصل سنة 1997 أزمة اقتصادية عالمية كادت أن تدمر دول النمور الاسيوية .

و عشان نرجع للي بدأ فيه ، الناس اللي بتقول ان النمو السكاني هو السبب في الازمات الاقتصادية و الاجتماعية و أنه السبب في زيادة معدلات الفقر و انتشار الامراض و الاوبئة و الجهل و ارتفاع نسب البطالة و الأمية و عمالة الاطفال فهما بالتفكير ده تجاهلوا تماما الخلل اللي حاصل في توزيع الموارد بين الناس ، و الاستخدام الخاطئ المتعمد المقصود من الرأسماليين و استهداف التكنولوجيا بس من أجل الربح و لخدمة مصالحهم مش من أجل إسعاد و راحة البشر . فلو احنا بنتكلم عن نظام رأسمالي يعمل بشكل عشوائي و يتحكم فيه مجموعة صغيرة من الرأسماليين اللي بيشغلوه بس عشان مصالحهم الخاصة في تجاهل تام لمصالح المجتمع فالطبيعي أن النتيجة هتكون هي أن الاغنياء هيزيدوا غنى و الفقراء اللي بيتم استغلالهم و ستهلاكهم هيزيدوا فقر .

عارفين إن وزارة الدفاع الامريكية ميزانيتها وصلت لــ 400 مليار دولار سنويا عشان تسليح الجيش و التدريبات و خوض الحروب و قتل الشعوب و غيره ، طب تخيلوا لو المليارات دي كلها كانت بدل ما تتصرف على قتل الناس اتصرفت عشان سد احتياجات الناس و اسعادهم أكيد شكل العالم كان هيكون مختلف عن شكله دلوقتي تماماً ، و طبعا فيه تفسير تاني لفقر الفقراء غير كثره الانجاب و الزيادة السكانية و هو تفسير وقح و قذر دايما يتردد على لسان رجال السلطة و أسيادهم الرأسماليين في كل دول العالم وهو أن الفقراء بيعانوا من الفقر ده بسبب كسلهم و جهلهم وأنهم مش بيحبوا يشتغلوا ، و طبعا ده تفسير غبي لأن الفقراء اللي بيتكلموا عليهم دول وبيقولوا عليهم كسالى هما اللي بيشتغلوا و طالع عينهم عشان يعيشوا هما مليارديرات في مكاتبهم المكيفة و إذا كان على جهلهم أو أميتهم أو عدم حصولهم على قدر جيد و مؤهل من التعليم فده بسبب نظامهم الرأسمالي و سياساته الأنانية الظالمة اللي فشلت في توفير فرص تعليم جيدة لهم و تعمدت تجهيلهم و تسطيح ثقافتهم عشان يبقى سعرهم أرخص لما مايكونوش عارفين حقوقهم .

لسه فيه تفسيرات تانية و حجج تانية كتير بتقولها الطبقة الحاكمة و أنصارها عن أسباب فقر الشعوب هتكون موجودة في التدوينات الجاية . 

 للتعرف على الاشتراكية الثورية بالعامية المصرية ..

                                       الاشتراكية الثورية .. ببساطة

خالد مش سعيد 

 

لما جن الناس يزيد
نحترف قطع الوريد
الانتحار يبقى الخلاص
و ف ملاك النار تقيد
يبقى خالد مش سعيد

لما تبقى الدنيا فانية
و نمشى على نهج الصهاينة
يبقى البنى آدمين مواشى
مات ولا ماماتش ماشى
و الكلاب فى عيشة تانية
نخاف نروح ورا الحديد
يبقى خالد مش سعيد

لما يبقى الرعب وصفة
لما يبقى الظلم حرفة
لما يبقى الجبن حالنا
لو خرجت يبقى مجازفة
لما هنلملم خيالنا
عشان خيال البيه بعيد
يبقى خالد مش سعيد

لما حقى يبقى ضايع
و أبقى حق للضبايع
لما ابقى فى حالى ماشى
و ابقى عرضة لأى صايع
و أن قلت مرة..تخاف تعيد
يبقى خالد مش سعيد

لما يبقى حبيب و عدلى
و الكره و الظلم انوعدلى
و المخبر ابن الكلب واطى
مسلوب رجولته احتياطى
عشان يبين انه راجل
ف كل سكة راح قعدلى
مأمور و عبد للعبيد
يبقى خالد مش سعيد

لما احس إنى جزمة
و إنى عمرى ما كانلى لازمة
و ملمومين عليا صيع
و الضرب نازل بالمعازمة
ويقولوا بركة اهو مات شهيد
يبقى خالد مش سعيد

لما صوتى الانتخابى
يبقى ف مقابل عذابى
لما أكون عايش مسالم
و الموت يكون عضة كلابى
يبقى الحل نظام جديد
عشان يكون خالد سعيد

مُلهِمَتي 

اشتقت لها فرسمتها
جميلةً تسبح فى عبير الأنهار
و تداعب الطيور بسماتها
تتخاطف الزهور منها الاعطار
و كأنها كنز الوجود للبشر
و المخلوقات جميعها
من جمالها تحتار...

ملهمتى ملاكٌ او جنيةٌ
فهى تفيض بالاسرار
يا ليتنى كنت شاعرا
فوصفها يجملُ الاشعار
و لا يزيد من جمالها شعرا
و لا تحتاج تغزلَ الشعار...

اجلس معها ساعاتٍ
انظر لها اياما
اسمع لها ضحكاتٍ
فتُغير الأحلاما
إن سكتت فتحدثى
لا تتوقفين كلاما
و إن تكلمت لا اسمعها
فالعين تخطف جوارحى
و العين تعشق الاصماما...

فجعلتها تبسمت
و على شفايا بسمتى
مرت يداى على شعرها
غفلت و ضمت لمستى
و تبسمت فى نومها
فنفخت فيها همستى
و كالملاك ضمت جناحيها
و حضنت يديها وردتى
و قد همست و تسمعينى 
ها انتى نمتى حلوتى
فلتصبحين كى اصبح 
فمنكى الصباح حبيبتى
غدا سأكمل ألوانكى
فأنا احبك...رسمَتى

 قصيدة حواء 

مُهدَاةٌ إِلَى كُلِّ حَوَّاء

أتت إلى تلك الحياةِ 
كائناتٌ
تُعْطِى للحياةِ حياتها
و لولا أن آتت الحياةَ
مخلوقاتٌ
ما عَلمْنَا يوماً جمالها

هى من سعد الحصى بسيرِها
و يهوى الفؤاد أسرها
واشتاقَ السحابُ أن تطيرَ
كى يُلامس شعرِها 

قد تكون كوكب احتواءٍ
أو مجرة ارتواءٍ..
قد عشق أدم ضمها
هى مَنْ أتت رقيقةٌ 
و طَعمُ الحياةِ على راحتيها..
و سيول عشقٍ قد جرت 
تنسال خجلا على شفاتيها
هى مَنْ تُحب أن تكون جميلةً
و أنا أراها جميلةًً بما لديها
لها صوتٌ جميل
 لها قلبٌ جميل
أخُلِقَ الجمَالُ مِنْ أجلها؟
أم خُلِقَت كى يكون إليها؟

أشهدُ أنكِ أنتى الأحن 
ذات الطبيعة الساحرة
و بدونكِ العالم يجن
أو يبقى ذكرى نادرة 
أشهد أنكِ أذكى من كل الرجال
تملكين من أردتى و من أرادك تملكين
و أشهد إنكِ قد علمتى جميع اسرارنا 
و لا زلتِ أنتى فى غيبنا لغزٌ مبين

فيكى جمالٌ مفرطٌ من داخلك
قد انهمر من الفؤاد حتى ظهر
و لولا إنى قد لمست أناملك
ما رغبت أن تكونى مثل البشر
و ما جئتى لمعشرنا هديةً
بل جئتى لنا كما البشارة
قد ظهرتِ أخر مخلوقةٍ..
كنجمةٍ...
قبل إسدال الستارة..

فتمردى ..
تمردي فى الاسرِ تبقين خالدةً
و لتقولى إن ذاكَ هو اختيارى
فلتكونى حقاً كما أراكى 
أسمى رمزاً فى اشعارى
فلتثورى يا حواء على مَنْ أبَى
أن تعيشى كريمةَ الذكر ِِالودود..
و لا تبكى ضعفاً 
يكفيكى فخرا أنكِ ..
أرقُ مَنْ أتَى للوجود

قصيدة .. من ؟

رأيتها تجلس وحدها...
فى ظل ضوء شارق...
وحيدة وسط الازهار...
ذات العبير السارق...
و ظلت تتحسس الفراشات...
على اخشاب شجر الدارق...
و كل هذا و هى جالسة..
و لمكانها لا تفارق...
اخشى نظرتها الثاقبة...
حادة تنظر كالسهم الخارق....
فما تتأمله ..تشبعه نظرا...
وتجذب الابصار كما البوارق....
و تمنيت ان تنظر لى .. أو لا تنظر...
فكم من ريح سير ...
باتت مغرقة الزوارق...

وجلست اراقبها و انتظر...
لو سنحت شبه فرصة لحدثتها..
وهى جالسة سقطت من يدها وردتها..
و جثوت على ركبتيها تبحث عنها..
و الظل قد عم المكان كله ...
أخذت تبحث بعيدا و هى قريبة منها...
ها قد جاءت إلىّ فرصة لا تعوض ...
فذهبت و جثوت على ركبتى مثلها ..
عذرا عما تبحثين ؟ ..
عفوا إلام تنظرين ؟..
فما أهتمت لما أقول و كأنى ما سألتها؟..
و قالت لى و هى منشغلة و لا تنظر إلىّ..
سقطت منى وردة كنت احبها ..
و قد جئت بها إلى هنا ..
و لا اريد ان أغادر بدونها...
فقد صنعت لى خير صنيعا
فضلاً أن وجدتها ..
فأخبرنى ماذا رأيت ..
ها هل رأيتها؟...
لما سألتنى...
ما عرفت ماذا اقول..
و ما علمت ما جرى ؟...
و قلت اقوالا لا تقال..
و الخجل تاه و ما درى...
قلت أرى ملاكا ..
قد جاء نعمة ً للورى ...
أرى بدرا يجثو بجانبى ...
و وقف عندى و ما سرى...
أرى حباً قد جاءنى من نظرة...
فى القلب كان يُحترى ...
أرى هدوء الملائكة..
و أحاطته هالةً منورة ...
أرى نظرة عاتية لا تحيد..
فيها شموخ القسورة ...
أرى بسمة قد اينعت ...
و باقات ورد مُزهّرة ...
أرى براءة الابرار ...
و أنفاس خجلٍ مُعطّرة ...
أرى حُسنا أجتمع عليه..
أهل المدائن و القرى..
أرى عجبا من خلق الله...
على وجهى بان و اعترى...
أرى جمالا لا يضاهى...
بكنوز الارضِ لا يُشترى...
فقاطعتنى لامسة.......
لملامحى متحسسة ...
- من يقول ذا الكلام ؟..
يا ليتنى كنت أرى...


أحمد طلعت

يا زفتــــزانــــي

قصيدة لبيرم التونسي  يدافع عن الاشتراكية والاشتراكيين بعد تكفير أحد الشيوخ لهم

و يذكر أن  محمود بيرم التونسي هو شاعر مصري ولد في الاسكندرية في ٤ مارس ١٨٩٣ ، ويعدّ من أشهر شعراء العامية المصرية و توفي بيرم التونسي في 5 يناير 1961م عن عمر يناهز 68 عاماً وذلك بعد معاناته من مرض الربو.

بيرم التونسي

الحمد لله لا انا لتات ولا عجان .. ولا قريبي بوليس سري ولا سجان

يا زفتزاني كلامي كله باذنجان ..  تبزق عليه الخلايق إنسها والجان

جماعة شافوا الغلابة ميتين م الجوع .. حنوا عليهم وقاموا وضّبوا الموضوع

جاي انت بتقول دين البلشفيك ممنوع .. ايش دخل البلشفيك في نجدة الانسان؟

لا في الجوامع رأيت مثلك ولا في الدير .. عالم و مسلم و بتعارض في فعل الخير؟

ما دام فضيلتك بتاكل كستليته و طير .. خلى الذرة و الدريس و الفجل للخرفان !

طب و انت مالك بتتفلحس و تتحشّف  .. و تخش فاللي مالك فيك وتتفلسف

هو نهار لما البلد دي هتتبلشف .. هيجردوك م العمة و الجبة و القفطان ؟

لأ و التلامة بتستشهدلنا بالدين .. إنه أمر يبقى المسلمين جعانين !

ان كنت فاكر شريعة العدل كان من بدعها لينين .. انظر شريعة نبينا نازلة في القرآن

كان النبي و الصحابة يجلسوا عالأرض .. مفيش لهم حد لا بالطول ولا بالعرض

متجمعين و الفقير عند الغني له فرض ..  و الكل في الكل إلا في الحرام إخوان

سيدنا عثمان ما كانش عنده رتبة بيه .. حتى الخليفة عمر كان يشتغل بإيديه

ولا إمامنا على كان عنده ألف جنيه ..  ولا ابو بكر عنده ست الاف فدان؟

و لما تتوزع الحنطة و صاع التمر .. كان اللي ياخده بلال قد اللي ياخده عمرو

و الامر لله لوحده هو صاحب الأمر.. بينزل سماوي ولا ديكريتو ولا فرمان

أوجب عليهم إله العرش شئ معلوم .. يطلع مفيش فيهم سائل ولا محرم

صبح الكلام ده النهاردة في بلاد الروم .. والمسلمين اصبحوا لا دين ولا ايمان

يشغلوا الشحط في الجامع بسبعة ريال .. يكنس و يمسح مجلات الأدب  ع العال

و اخر الشهر يتحاسب على الإهمال ..  يطلع من الدين و الدنيا كمان خسران

و يبقى فيهم غني مغرور و صاحب بنك .. يشغل ابن الاصول طول النهار بفرنك

وياما ألوف الألوف يا مسلمين في ضنك .. أكل التراب و العبَك من جسمهم ريقان 

و ما دام فضيلتك بتاكل كستليته و طير  .. خلي الدره و الدريس و الفجل للخرفان

بيرم التونسي

ماهينور

ماهينور اهيه .. يا خلاسي :D

ماهينور .. انا وربنا ما اعرف يعني ايه اصلا  اسم ماهينور ؟ بس هو اعظم اسم حصل في تاريخ البني ادمين ! عشان فيه واحدة اسمها ماهينور المصري ! مين ماهينور المصري دي؟ دي اعظم بنت حصلت في تاريخ البني ادمين بردك ! لو فتحت كتاب عبمجيد الصحاح و دورت على ماهينور المصري هتلاقي التعريف بتاعها : هي المرأة التي كلما رأيت مواقفها و شجاعتها و روحها و إرادتها حسيت إنك كرجل عمال تاخد على قفاك و انك مهما هتحاول تبقى زيها هتبقى نص لبة برضه ! هي اكتر واحدة ممكن تحببك في الثورة و في النضال .. مش محتاج اكتر من مرتين تشوف فيهم ماهينور و هي بتهتف و بتوزع بيانات و بتتكلم مع الخلق و آدي دقني لو فوت مظاهرة بتحصل في العالم عامة بعد كدة ! فيه ناس ممكن تقول ايه المبالغة دي هو فيه بنت يتقال عليها كدة بجد ؟ اه وربنا فيه ! ماهينور اهيه ! لأ و هي  كدة عادي يعني مش بتبذل مجهود عشان تبقى كدة ! انت تعرف ماهينور ؟ ما وربنا لو تعرفها هتقول كدة زي ما انا بقول .. ماهينور بالنسبالي ماما و بابا و انور وجدي  و بتعملنا اكل و سندويتشات في الاعتصامات و بالعربي متبنيانا كلنا و هي طاقة من الثورة و الامل متحركة على الارض في عز ما كلنا بنبقى محبطين هي بتكون متفائلة و بتجننا كلنا و في الاخر هي اللي بتبقى صح .. وربنا يا ناس  لو فيه في اسكندرية بس 100 ماهينور كان زمان العسكر طاروا في دقيقتين خمسة و تلاتين ثانية ! ونبي يا بنات خليكم زي ماهينور عشان مصر تبقى حلوة وبلاش تاخدوا الموضوع بنفسنة يعني عشان هي بنت و كدة و الحقد يشتغل و كدهون  لأ بصلها على انها حاجة حلوة في الحياة وخلاص  ! فيها ايه لما مصر كلها تبقى زي ماهينور ! عيد ميلاد ماهينور بكرة و انا مجبتلهاش هدية عشان هي اصلا اللي متبنياني يعني المفروض عيد ميلادي بقى عيد ميلادها هي برضه اللي تجيبلي هدية ! بس انا قررت اكتب التدوينة البسيطة دي عن ماهينور بس هي اصلا تستاهل يتكتب عنها كتاب اساسا  طب وربنا ما ببالغ بقى هه .. و في نهاية التدوينة احب ادعوكم لمعرفة ماهينور و احب اقول لماهينور انا بحبك جدا وربنااااااااااا بقى  و انتي اعظم ماهينور حصلت في تاريخ البني ادمين و المصحف يا شيخة بقى يا شيخة ! و إن شاء الله لو فيه واحدة رضيت تتجوزني و جبت بنت هسميها ماهينور على اسمك و ربنا يخليكي لينا يا ماما ماهي و يفرحك و يسعدك كدهون زي ما انتي مفرحانا  كدهون و نصحى الصبح نلاقي مصر كلها ماهينور ماهينور ماهينور في كل مكان زي الفيديو كليب بتاع حكيم دوّن بتاع اس اس السلام عليكم ! و طبعا كل الكلام اللي انا قلته ده ولا ربع من خمسة من عشرة على مية في المية من ماهينور ! انا عارف ان كلامي عبيط ! بس انا هجيب كلام عاقل منين ؟ المهم بقى عشان مبقاش لكاك كل سنة و انتي عظيمة يا اعظم ماهينور في الدنيا وربنا يخليكي على طول ماهينور كدة و مش عارف اقول ايه تاني و بس خلاص كدة و مع السلامو عليكم والله الموفق و المستعان  :D