الاشتراكية الثورية .. ببساطة

انا عايز اكلمكم عن الاشتراكية الثورية بس بالعامية و من غير كلكعة ! أبدأ منين ؟ و ربنا ما عارف .. بصوا الكلام اللي هقوله ده هو نتيجة لكل ما قرأته في حياتي و هو تحليلي  الشخصي للافكار اللي تلقيتها .. انا مؤمن إن الاقتصاد هو زرار تغيير المجتمع ! يعني من الاقتصاد ممكن تشكل اي حاجة انت عايزها في المجتمع ... ثقافة، سياسة، فن، رياضة، اخلاق، قيم و كل حاجة تيجي في بالك .. زي ما بيقولوا السياسة في كل شئ ... الاقتصاد كمان بيُنتج منه كل شئ ! .. يعني لو انت عايش عيشة كويسة بتتعامل في شغلك معاملة محترمة، حاسس انك انت و زملائك بتاخدوا حقوقكم و شغلكم و انتاجكم بيبسط الناس و بتاخدوا في المقابل مرتبات كويسة بتفرحكم انتم و الناس اللي انتم مسئولين عنهم ... تفتكر لو المجتمع كله عايش كدة .. أخلاق المجتمع ده هتبقى عاملة ازاي ؟ نسبة الغضب فيه هتبقى عاملة إزاي؟ نسبة القضايا و الحوادث و السرقات هتبقى عاملة إزاي ؟ نسبة الرشاوي و الاختلاسات و الفساد هتبقى فيه عاملة إزاي ؟ أعتقد إن مجتمع يتوفر فيه اقتصاد جيد و معاملة آدمية توفر للعاملين حقوقهم و احترامهم ! مرتبات جيدة و تأمين صحي و رخاء و رفاهية هيكون مجتمع عظيم رايق مش عصبي ولا غاضب ولا حرامي ولا نصاب ولا متهور و هيكون مجتمع منظم و بيحترم الطابور و اشارات المرور و بيحترم القانون في اي صورة من صوره لأن القانون ده هو اللي بيديله حقه كامل .

الاشتراكية الثورية .. كلمتين اشتراكية و ثورية .. الاشتراكية هي طريقة اقتصادية اجتماعية ... يعني ايه اقتصادية ؟ يعني بتنظم تعاملات الشعب في كل ما له علاقة بالفلوس ، و يعني ايه اجتماعية ؟ يعني كمان بتهتم بحقوق الانسان و حرياته الكاملة و آدميته . طيب الاشتراكية دي عايزة ايه؟ عايزة إن الشعب كله يشارك في حكم بلده ! ليه ؟ عشان ببساطة هي بلده ! ايوة عايزين ايه يعني؟ احنا بصراحة و من غير اساءة أدب ولا أي حد يزعل مننا عايزين الشعب يمتلك بلده ! .. الشعب يمتلك بلده اه والله مش بهزر فيها ايه ؟ .. طيب و الطبقة الحاكمة دي الشعب هيعمل راسه براسها ؟ عايز يحكم مكانهم ؟ اه و فيها ايه يعني ! انتو ليه محسسني إن الطبقة الحاكمة دي هي اللي جابت شعب تحكمه ! و كتر خيرهم إنهم سيبينه قاعد معاهم في نفس البلد !..

احنا بالصلاة على النبي كدة عايزين العمال يملكوا وسائل الانتاج اينما وجدت ! مش هتتكتب باسمهم يعني ولا هياخدوها معاهم و هما مروحين .. بس هتتكتب باسم الشعب .. بذمتك ! .. مين اكتر واحد بيفهم في شغله و في آلته و في المنتج بتاعه؟ ... رجل الاعمال ولا الراجل العامل المكفي على ألته بالعشرة و الاتناشر ساعة ؟! طب هات رجل الاعمال ده كدة وقلعوا جاكتته الشيك و كرافتته العظيمة و وقفه قدام الإله كدة و قوله شغلها و اعمل منتج ! هيبقى زي طور الله في برسيمه ... و مع ذلك الاله اللي مش فاهم فيها حاجة دي هي اللي مخلياه سعادة الباشا .. فأحنا عايزين العامل المتمرط ده يبقى هو مالك الآله بتاعته و العمال و الموظفين دول يقعدوا مع بعض و يشكلوا مجلس ادارة المصنع و يتفقو مع بعض على كمية الانتاج اللي هيقدروا يحققوها في الشهر مثلا و يقدروا يحددوا مع بعض ايه هو الحد الأدنى و الاقصى للاجور في المصنع ده على شرط إن فرق الاجور يكون منطقي و غير مبالغ فيه .. و كل واحد ياخد على حسب انتاجه ... ده يزعل حد غير لو واحد عايز ينهب و يكوش يا عم الحاج ؟

احنا مش ضد وجود وسائل انتاج خاصة إلا لو كانت سلع غذائية او منتجات اساسية زي البترول و الحديد و الاسمنت و غيرهم ! ممكن تستخدم في الحروب انها تمسك الشعب من رقبته تخنقه او في اي ظرف من الظروف واحد يقولك شطبنا ؟ تقوله شطبنا ليه ما انت عندك جوا اهو ؟ يقولك لو عايز من اللي جوا ده عشان خاطرك بعشرين جنية ! تقوله بعشرين ليه ما هو كان بعشرة ! هيقولك روح جيب من ابو عشرة لو لقيت ! و طبعا غصب عنك هتجيب من ابو عشرين لأنك مقدامكش غيره !

عايز تعمل مصنع او شركة خاصة تكسب منها مليارات .. اتفضل يا حبيب قلبي ! بس تلتزم بالقوانين تبقى صاحبي و حبيبي و كفاءة تنحرف و عايز تنهبني و تسرق الناس ! هظرفك "لوكامية" في سقف حلق بوءك هندغك سنانك هعصرك كدة انزل منك رجال اعمال صغيرين ! اولا يا كابتنة هتلتزم باسعار جبرية تحطها على منتجك عشان ميبقاش فيه حد بيفاصل ولا يعلي السعر ولا يقلله ! هتمشي بالضريبة التصاعدية ! نسبة الضريبة بتاعتك كل ما هتكسب اكتر كل ما هاخد منك ضريبة اكتر ... ليه ؟ مش واحد بيسكب مليارات يدفع ضريبة زيه زي واحد عنده كشك سجاير ...   اقولك انا ليه ؟ هو مش انا الشعب ؟ طيب هو مش حضرتك هتاخد ناس من الشعب بتاعي ؟ اه ! طيب مش الشعب بتاعي كان ممكن يشتغل في مصانعي انا و يطلعلي منتجات حلوة جميلة و بسعر اقل و بنفس الجودة ! بس عشان الشعب بتاعي راح اشتغل عندك و كسبك شوية فلوس حلوين ! حرم بقية الشعب التاني من انه ينتج له بسعر اقل في المصانع المملوكة للشعب ! فمعلش عايزين ضريبة اكثر شويا !  تالت حاجة  يا واد يا دوءدوء عايزينك تحترم العامل و توفرله كل حقوقه و علاجه و كل شئ وكمان تحدد ساعات العمل بأنها متتخطاش 7 ساعات و متنساش الاجازة !

طيب و هي مالها الراسمالية و الليبرالية عملتلكم ايه؟ ايه هي الليبرالية الاول ؟ بس يا عم الليبرالية دي هي الراسمالية بس معاها شوية حريات على حقوق الانسان مش هينفعوا اصلا يتطبقوا في وجود الراسمالية !

اولا الراسمالية دي قايمة على فكرة السوق الحر ! دعه يعمل دعه يمر ! ملكش صالح بيه يا عم ! ان شا الله يبيع هوا في ازازة .. بدل فيه شوية ناس بتشتري و بيبيع سيبه في حاله ! قايم على فكرة العرض و الطلب ! يعني والله انا عايز ابيعلك شوية هوا في ازازة بخمسة جنية الازازة ! عاجبك عاجبك ! طيب انا معيش غير 25 جنية ؟ خلاص خد خمس ازايز هوا ! طيب انا محتاج ست ازايز ؟ ميلزمكش اتكل على الله ع الصبح ! تقوم تصحى الصبح تلاقي فيه شركة تانية فخمة قررت تبيع الهوا في ازازة و الازازة بأربعة جنية بس ! فتروح تشتري الست ازايز بأربعة جنية بس ! فمين يخسر ؟ الراجل اللي بيبعها بخمسة ده يروح لابس شلوط في وشه و ازايز الهوا بتاعته ترطرط في السوق ! قدامه حل من حلين ! يا المصنع بتاعه ينهار علي فيه من عمال غلابة ملهمش ذنب بهزاره هو و الاخ بتاع المصنع التاني ابو ازازة الهوا  بأربعة جنية ده فالراجل يفلس و يسرح العمال و تزيد نسبة البطالة ! يا أما عنده حل تاني ! يبيع هوا كمان الازازة بأربعة جنية بس بجودة احسن ... طيب ازاي ؟ يا أما يشيل الجنية الزيادة ده من مرتب العمال فصافي الربح بعد توزيع الاجور عليهم يزيد ! يا أما يخلي العمال يشتغلوا لفترة اكبر بنفس المرتب عشان يزود انتاجه فيزيد دخله فصافي الربح بتاعه يزيد برضه ! يا اما فيه الحل التالت و ده بيكون من تحت الطرابيزة أنه يبقى رجل سياسي مهم او عضو مجلس شعب مهم أو وزير مهم أو عضو مهم في الحزب الحاكم للبلد و يمشي البلية كلها لصالحه ! بالبلدي كدة احتكار صناعة ازايز الهوا .. و ده اللي بيسموه تزاوج المال بالسلطة ! يا يعمل كدة يا إما في ظل تضخم أموال الراسماليين من حوله هيكلوه هم النم ! و عشان كدة كارل ماركس قال " إن الرأسمالية تأكل نفسها " ... و يريتها بتيجي على دماغ الرأسمالي بس دي بتيجي اكتر على دماغ العامل الغلبان اللي بيلاقي نفسه عاطل فجأة ! و ده ليه ؟ بسبب أنه السوق حر ! غير منظم ! يعني مصنع العربيات بيبقى عارف هو بينتج كام هيكل عربية و كام عجلة و كام  ماتور ! عشان في الاخر يركبهم على بعض يطلعوا عدد معين من العربيات بدون ما يتفضل اي اجزاء زيادة فالمصنع يخسر ! ده ليه عشان هو منظم و عرف هو " محتاج " ايه ؟ ! لكن مصنع مرسيدس و مصنع بي ام دبليو مش بيظبطوا ولا بينسقوا مع بعض عشان يشوفوا السوق مستحمل عدد عربيات قد ايه ؟ و امكانية اغلبية الناس في الشراء بتوصل لغاية سعر كام ؟ فبينتجوا هما الاتنين مع بعض و العربيات تبقى مرطرطة في السوق مش لاقيه اللي يشتريها فيخسر المصنع و العامل يلبس في الحيطة !

يعني ايه الراسمالية تهدف إلى الربح او المكسب ! يعني والله انا شايف ان مصر فيها 25% من شعبها مصاب بالكبد و مع ذلك دواء الكبد بعشرة جنية و بيتكلف لأنتاج كمية منه بعدد معين حوالي 100 مليون جنية مثلا عشان اكسب منه 150 مليون جنية ! طيب ما صوباع الروج ثمنه 20 جنية و بيتكلف في انتاجه 50 مليون جنية بس و ممكن اكسب منه نفس ال 150 مليون جنية لأني هنتج كمية اكثر بنفس راس المال ! طيب ما انا انتج مستحضرات تجميل و فكك بقى بلا دواء كبد بلا وجع دماغ ! انا حر يا عم ؟ ده سوق حر ؟ انت هتقولي انتج ايه و ما نتجش ايه ؟ المهم اكسب !

يعني ايه تاني الراسمالية تهدف إلى الربح مش فاهم يعني؟ يعني انت عندك في مصر 10 ملايين واحد مش لاقي مكان آدمي يسكن فيه و عايش في العشوائيات بدون اي مرافق ولا كهرباء و لا مياة نظيفة ولا شبكة صرف صحى حتى ! و في ظل ده كله بتلاقي كل يوم فيه مدينة عالمية على ارض مصرية عندك بقى الرحاب و بورتو سخنة و مدينتي و غيرهم ! طيب ما تعمل للناس دي مساكن على قد امكانيتهم و تكسب منهم برضه ؟ لا يا عم المكسب من دول ملاليم ! انا عايز اكسب مليارات ! طيب و مين هيسكن العالم دي طيب؟ هيفضلوا في الشارع كدة و العشش و البيوت الصفيح كدة ؟ قول للحكومة بقى تشوفهم في الخطة الخمسية اللي بعد اللي جاية و عليك خير !

الله يخليك متفهمش ان احنا بنحقد على الاغنياء ! ازاي واحنا بنحارب ضد الفقر ؟ اللي بيكره الفقر و عايز يقضي عليه يبقى بيحب يكون غني ولا فقير ! يبقى عايزالناس تكون اغنياء ولا فقيرة ! عايزين الناس تكون اغنياء بس من عرقها مش من عرق الناس اللي بتعرق بجد و فقراء زي ما هما و قربوا يموتوا بفقرهم !  لما يبقى فيه ألف أسرة في مصر هي اللي مالكة مصر كلها يبقى فيه حاجة غلط ! يبقى بقية الملايين دول ملهمش لازمة في الحياة ! جايين العالم عشان يخدموا الباشاوات و البهوات عشان يزيدوهم فلوس على فلوسهم و يزيدوا هما فقر على فقرهم ! ده يرضي مين يعني ؟ احنا عايزين نوصل بالتدريج باتباع النظام ده إلى ما يسمى بإعادة التوزيع العادل للثروات في مصر ! يعني الفرق الطبقى بين الطبقات يقل لأقصى درجة ممكنة ميبقاش فيه حد غني اوي اوي اوي و حد فقير اوي اوي اوي ! و يكون الجميع سواء غني أو فقير شويا بالمقارنة مع الغني عايشين عيشة كريمة متوفرلهم تعليم جيد و علاج جيد و رفاهية و كل شئ يحترم آدمية الانسان .

قصدك يعني نظام التأميم هو ده الاشتراكية زي ما عمل عبد الناصر ؟! هوب بوب بوب بوب بوب ... وقف عندك ! عبد الناصر اصلا مكانش اشتراكي ! عبد الناصر هو و مجموعة من الضباط عملوا انقلاب عسكري على الملك فاروق و نفخوه برة البلد و استولوا على حكم البلد و بعدين؟ هو كان عايز يحارب اسرائيل ! و فيه في العالم قطبين كبار مسيطرين على العالم و بيكرهوا بعض و كان فيه بينهم حروب باردة تاريخية ! القطب الامريكي الرأسمالي و قطب الاتحاد السوفيتي اللي بيميل لمبادئ الاشتراكية ! طيب انا عايز سلاح  احارب اسرائيل؟ و امريكا بتدعم اسرائيل ! طيب اخد سلاح من مين ؟ من الاتحاد السوفيتي ! الاتحاد السوفيتي ده بيحب الاشتراكية ! خلاص يابا انا بحب الاشتراكية كمان بس أدوني سلاح ! و أول ما أتوكسنا في النكسة جرجروا الاشتراكيين تاني على السجون ! ايش حال مكانش اكثر ناس مسجونة في عهد عبد الناصر هم الاشتراكيين و الشيوعيين ؟ كنتوا قلتوا عليه ايه بقى ؟ طيب نظام عبد الناصر ده اسمه ايه؟ اسمه رأسمالية الدولة ! يعني ايه ؟ يعني النظام الحاكم اللي في البلد يقشط كل اللي في البلد و يديره هوا بالحكومة ! صلاة النبي أحسن..هو ده حكم الشعب؟ دي الدولة هي اللي اتحولت لرأسمالي كبير و واحد بس و محتكر كل شئ عشان كدة اسمها رأسمالية الدولة !  

طيب كويس و الكلام الحلو بتاعك ده هنوصله ازاي ؟ فاكرين لما قلتلكم ان الاشتراكية الثورية كلمتين ! اشتراكية و ثورية ! انتو كدة غالبا عرفتوا اغلب مبادئ الاشتراكية و ليه احنا ضد الراسمالية ! دلوقتي بقى تعالوا نفهم إيه الثورية دي و ازاي تحصل ! احنا بنؤمن بالثورة و إن الحل في تطبيق النظام الاشتراكي و تحقيق العدالة الاجتماعية في المجتمع مش هتحصل غير في وجود ثورة اجتماعية ضد النظام الرسمالي المستغل ده ! طيب و مين اللي هيعمل الثورة دي؟ الناس المضرورة من النظام اللي بيسرقهم و بيتسغلهم و بيمص دمهم و بيكنز هو مليارات و بيديهم ملاليم مش مخلياهم يعرفوا يعيشوا .. ايوة مين يعني ؟..الناس اللي هتقود الثورة دي هما العمال و الفلاحين و الطلبة اللي هيبقوا بعد كدة عمال لما يتخرجوا ... و عشان كدة قادة الثورة هما الطبقة العاملة الحالية والمستقبلية!

واشمعنى الطبقة العاملة ؟ ببساطة عشان العمال كتير و هما اللي شايلين البلد على دماغهم بعرقهم و مجهودهم و منظمين مع بعض جوا المصنع و صحاب سوا و مضرورين سوا ! و هما الوحيدين اللي يقدروا يمسكوا الرأسمالي المستغل من رقبته هو و النظام  لو بس قاله احنا مش شغالين غير لما ناخد حقوقنا ؟ و اعلى ما في خيلك اركبه ! و هو ده اللي اسمه اضراب عن العمل !

طبعا النظام الراسمالي المستغل مع موجة كبيرة من الاضرابات و الاعتصامات و التظاهر مش هيقدر يصمد كتير و هيطير ! بس لازم الموجة او الانتفاضة العمالية دي تكون منظمة و موحدة عشان النظام المستغل يسقط في البلد كلها مش في مصنع واحد او شركة واحدة ! طيب مين اللي هينظم الموضوع ده ؟ الحزب الثوري !

لو الاضرابات و الاعتصامات و المظاهرات مكانتش منظمة من خلال الحزب الثوري ده ! النظام الراسمالي هيقدر يسكت كل اضراب بشوية فلوس و وعود لغاية بس ما يشتغلوا و بعدين يحلها حلال او هيقدر يقمعهم بالضرب او بالسجن او بإجبارهم على العمل او يمكن تصل لفصل بعضهم لتخويف الاخرين ! لكن لو الاضرابات و الاعتصامات دي حصلت في كل المصانع و الشركات المستغلة لعامليها مش هيقدروا يلاحقوا عليها ! هيضربوا مين ولا مين ؟ هيسجنوا مين ولا مين؟ هيسكتوا كل الناس دي بحوافز و علاوات ازاي ؟

عشان كدة لا بد من وجود تنظيم من القيادات العمالية اصحاب الخبرات العملية بالتعاون مع الطلبة اصحاب الخبرات الثقافية و الفكرية داخل هذا الحزب الثوري من أجل اسقاط هذا النظام الرأسمالي المستغل و حكم الشعب لبلده !

احنا بنؤمن ان الاشتراكية مش هينفع تكون في بلد واحدة ! و ده هيودينا لمفهوم الثورة الدائمة أو المستمرة !

يعني زي ما انتوا شفتوا كدة يمكن لو كنت قلتلكم الكلام ده قبل 2011 مكنتوش صدقتوني و قلتوا ده خيال واسع بس الواقع اثبت صدق النظرية دي ! و لأن العالم كله بيحكمه هذا النظام الرأسمالي المستغل بهمينة من الأمبريالية الامريكية فشعوب العالم كلها مضرورة منه مش احنا بس ! و عشان كدة زي ما انتو شوفته موجات الثورات اللي قامت في المجتمع العربي و خرجه ! من تونس لمصر لليبيا لليمن لسوريا للبحرين لاسبانيا لليونان لانجلترا لوول سترييت بأمريكا لروسيا و غيرهم و غيرهم   ! بهذة الموجات من الثورات تنهار الرأسمالية و الامبريالية الامريكية و نلاقي عالم قائم على العدالة و المساواة و يكون عالم انساني بأقصى صور الانسانية بدون اضطهاد او تمييز يحترم حقوق الانسان و يبحث عن حياة كريمة له و يوفر له سبل الرخاء و الرفاهية الكاملة ! لأن لو بلد واحدة طبقت النظام الاشتراكي و حواليها العالم كله رأسمالي ! هتتاكل و هترجع تاني رأسمالية بسهولة !

و عشان أنا وعدتكم أني مش هستخدم مصطلحات مكلكعة ! انا قلت في وسط الكلام امبريالية ؟ و محدش فيكم وقفني عن الكلام ! ماشي ماشي ! .. يعني ايه امبريالية يا برادعي ؟ ببساطة هي إن حد يبقى محتلك اقتصاديا و فكريا و سياسيا و وجود جيشه في بلدك مش شرط اساسي ! محتلك باستثماراته و بثقافته و بحكامك العملاء له ! و اللي بتمثل الامبريالية في العالم في وقتنا الحالي زي ما انا قلتلكم هي أمريكا ! بس كدة هي دي الاشتراكية الثورية ببساطة  .

اه ثانية واحدة ! هو أنا كدة كنت خلصت بس كنت عايز اسألك سؤال؟ شوفتني جبت سيرة الدين او أننا ضد الدين و بندعو للالحاد أو أي حاجة من الكلام اللي بيتقال علينا عن أننا ملحدين و بنعبد ماركس و لينين و تروتسكي؟ طيب ازاي ملحدين و بنعبد ؟ مش نفكر قبل ما نخترع اتهامات باطلة حتى ! احنا مش بنفرق في نضالنا ضد الرأسمالية  بين رأسمالي بسيجار كوبي فخم و رأسمالي بسبحة من الزمرد ! في النهاية نحن نناضل ضد كل ظالم مستغل ! و ندعم كل عامل مقهور بيمصوا دمه سواء كان العامل ده مسلم أو مسيحي ! سواء كان متدين ملتزم او غير ملتزم دينيا ! و احنا عمرنا ما كنا بندعو للعلمانية ! اصل هي مش بلطجة ! مينفعش اقول العلمانية هي الحل و هو ده اللي هيتنفذ أو الدين هو الحل ! عاجبكم عاجبكم مش عاجبكم  سيبوا البلد ! معلش ثانية واحدة .. معلومة بس .. مش طلع عندنا شعب هو اللي بيقرر ؟ اصل انتو باين كنتوا ناسيين ! احنا بنقف مع اي مناضل ضد الفقر و الظلم و الاستغلال سواء كان بيرفع شعار ديني  زي حرب فيتنام و افغانستان ضد الاحتلال الامريكي ! و كمان بنناضل ضد من يضطهدون الشعوب باسم الدين زي نظام السعودية و السودان و الباكستان .. احنا بندعم الحرية الكاملة للاعتقاد و ممارسة كامل الشعائر الدينية، زي ما احنا بنناضل ضد اضطهاد المسلمين في اوروبا و امريكا بنناضل من اجل المساواة التامة بين المسيحيين و المسلمين في مصر في كافة الحقوق و الواجبات ايضا ! المرة دي بجد خلاص كدة هي دي كل الاشتراكية الثورية . 

لو عجبتك افكارنا دي و عايز تنضم لحركة الاشتراكيين الثوريين في مصر 

 املأ  استمارة طلب الانضمام لحركة الاشتراكيين الثوريين 

عشان نكمل سوا النضال 

الاشتراكيون الثوريون

نُنَاضلُ مِنْ أَجْلِ أَنْ تَكُونَ كُلُّ السُلْطَةِ للشَعبِ

و ممكن تتعرف اكثر على افكارنا و مواقفنا و فعالياتنا بشكل اكبر على الموقع الالكتروني: 

 www.e-socialists.net

تحياتي :)