الاثنين، فبراير 11، 2013

يادي الحياة

فضفضة او شخبطة .. مش شعر

 

 

يادي الكلام اللي اتكتب قبل منه مليون كلام .. ويادي العلام اللي اتبررت بيه الالام .. 

و يادي الالام .. ويادي الظروف اللي حكمانا و منعانا و فارضة علينا نمشي مطرح ما يعوز اللي قام .. مطرح ما يكون المكان فاضي ومش فاضي مكان غيره و مش فاضل مكان قدام .. يادي الفراغ  اللي اتولد من انعدام .. يادي السذاجة في كل حاجة .. ويادي النظام .. و كل حاجة ماشية دوغري بانتظام .. و يادي القراية و الكتب والاحترام .. ويادي ضعف المعاني .. ويادي قلة الاهتمام .. و يادي الثقافة .. و يادي المشاعر اللي بتبرر وجودنا بشوية هيافة .. و يادي الفراق اللي بينهي كل شئ بمنتهى السخافة .. ويادي الاجبار و التكرار و يادي الملل .. و يادي التاريخ و يادي الصريخ و يادي الزعل .. و يادي العشم اللي اتهرى .. ويادي الشجاع و يادي البطل و يادي الجبان اللي جرى .. ويادي القلب اللي انكسر .. ويادي القلب اللي فرح .. ويادي العقل اللي طرح كل الكلام ... يادي الكسوف اللي منع عنّا حاجات .. ويادي الخوف اللي اتصنع جوا الحاجات .. و يادي القيم و الحكم و يادي العادات .. و يادي كل حاجة فارغة جت تغطي ع السكات .. يادي الرتابة و الثواني والساعات .. ويادي العمر اللي بيجري عشان اهبل .. عشان مجبور .. عشان مقهور .. عشان مش عارف إلا الجري .. عشان ده حق كل واحد حي .. ويادي الحقوق .. ويادي الحروب و يادي الدم و يادي الجهل .. ويادي الصعب و يادي السهل .. ويادي كل شئ مفروض.. ويادي الاسم ويادي السن ويادي الفعل ..ويادي الورث و يادي الاهل.. ويادي كل شئ معروف ..ويادي كل من عارف..ويادي كل من فاهم .. ويادي كل من حافظ ..ويادي كل من شاكك و متردد .. ويادي كل من مؤمن و متأكد .. ويادي كل حاجة تغير الاحوال .. يادي علامات التعجب .. ويادي السؤال ..يادي علامة استفهام.. ويادي الدايرة ..ويادي كل شئ داير .. ويادي كل شئ واقف ..ويادي كل شئ ساير .. ويادي كل اللي ابتلى .. ويادي كل من عاير .. ويادي كل من صاحبك في وقت بس ما يحبك .. ويادي من حكى سرك .. ويادي تاني مواضيعك .. ويادي كل من باعك .. ويادي اللي هيبيعك.. ويادي النفاق و الادعاء .. ويادي الذمم ويادي الضمير .. ويادي كل شئ بيطير .. ويادي كل شئ مفهوم ..ويادي اللي مش فاهمه .. ويادي كل قلب اترسم ..ويادي من حطله سهمه.. ويادي الحكاية والبداية والنهاية .. ويادي لفة الدواير .. ويادي العدل مش عادل .. ويادي الظلم والجاير ..ويادي كترة الكلام..ويادي كل من عايش .. ويادي من ساعات الحزن .. ويادي من لحظة فرح .. ويادي فاصل الحياة .. عايش بين ساعات الحزن و لحظة فرح فاصل حياة .. عقبال ما بس يفهم مين عليه و مين معاه .. يكون بقى اللي معاه عليه وناس معاه بقيت بعيد وناس بعيد بقيت معاه ..تايه زي خفاش في النهار  رافع شعار محدش عارف فين النصيب راح يلقاه .. وفهموه بالغلط ان الزعل مفروض .. وان الفرح موجود .. وشافه مين جاها .. واللي مادقش الحزن .. مايدقش طعم الفرح .. راح غصب عنه سرح .. واتزق جواها .. توهة  وايه اخرتها غير موتة .. و ناس تانية جاية تتكلم و تتأمل و تتألم و تصرخ آه .. لحد ما تمشي و تكمل نفس الطريق مع اللي عدى وتاه..ويادي السكوت ويادي الروح و يادي النَفَس .. ويادي القيود اللي جبرانا و خنقانا مهما تدينا النَفَس ..

 ويادي كل مين تايه .. و يادي كل مين هيتوه .. ويادي مين سبقنا و تاه .. 

ويادي الحياة  ...

الاثنين، يناير 21، 2013





عيب ما تشتمش بنت ..





     شعر جميل و ملامح ناعمة و قلب طيب و ايد حنينة .. و ضحكة .. 
خاطر سريع الكسر و كرامة عالية الحساسية .. و حسن نية ..ضعيفة بس انسانة .. رقيقة بس جدعة .. مصدر أمان .. و بتحتاج أمان .. بتخاف 
و محتاجة تطمن .. و بتطمن اللي يخاف .. بتجنن و تتعصب ..
 و بتهدي اللي متعصب .. مجنونة ..  و بتحب الهدوء و الدوشة ..
 بتدوّر ع الفرحة و الحرية .. بتفرح بحاجة بسيطة .. و بتزعل من حاجة بسيطة .. مش عايزة كل حاجة تبقى ليها .. بس عايزة تكون سعيدة ..
لو أنت مش مصدر سعادتها .. حاول تكون .. و لو معرفتش تسعدها .. ماتكونش مصدر حزنها .. ماتضيقهاش .. سيبها براحتها .. 
عايزة تكون حرة زيّك .. 
ماتحكمش عليها من لبسها .. لأنك ما تعرفش اللي جوا قلبها .. 
ماجربتش تسمع فكرها .. لأنك ماشوفتهاش غير بعنين القماش .. قدرتها أكبر من حلمها .. و حلمها اكبر من خيالها .. بس محتاجة تعرف مكانها ..
 بتعرف تتحمل مشاكلها .. و بتعافر عشان تحلها .. ماتزوّدش عليها مشاكلك .. ماتحملهاش اكتر من طاقتها .. عشان ما يصحش.. 
عشان عيب ..
ماتستغلش قوتك في أنك تزوّد خوفها .. ماتستغلش جرأتك في أنها تكون مرعوبة..احترمها .. ماتمدش ايدك عليها .. عشان مايصحش ..
 عشان عيب..
ما يصحش تضحك جوا نفسك على رعشة ايدها .. عيب يكون مصدر رجولتك هو رعشة رموشها .. عيب تزوّد في رجولتك من زيادة ضربات قلبها .. عيب لو شفت ده كله تعرف تنام تاني .. عشان ما يصحش .. عشان عيب .. عيب ماتشتمش بنت ..

الاثنين، ديسمبر 03، 2012

عذراً حبيبتي ..




سيدةُ الكونِ بأكمله .. 
ما عادَ اللقبُ يناسبُكِ ..
قد زادت بالكونِ حروبٌ و امتلأ بضجيجِ رصاص ..
أحبك مهما يعلو القصفُ و مهما حَطَم كل أساس..

 أحبك مهما اشتدَ العرضُ و مهما انحبست أنفاس .. 
أحبك مهما أصابَ النفسَ ومهما انحدر الاحساس..
 قد صارت إنسانيتنا عاراً و بشريتنا تحت مداس .. 
عذرا إذا يوماً سميتك سيدة الناس .. 


بقايا البشر قد هبوا بقبحهم .. 
و مازلتِ أنتِ بكل الجمال تتفردين ..
 و جينات الظلم قد سادت .. و كُتِب على جبهات الحاقدين .. 
" نحن أناس قد ماتت ضمائرنا و تجبرنا ..
و فاق طغياننا فوق العالمين " .. 
و أنتِ ملاكٌ ..
 لا حول لكِ ولا قوةٍ ..
 فلمَ بين الضباع تعيشين ؟! ..
 حبيبتي لنبحث أين تسكن الملائكة ؟! ..
 و من أين شردتِ إلي هذا الكون اللعين ؟ ..

اعتذر إن كان اعتذاري يفيد .. 
 اعتذر و اعتذر و اعتذر من جديد ..
 لقد تشبثت بكِ كطفلٍ خائفٍ أن تنساه أمه وسط السوق ..
 كفتاةٍ يحاوطها الذئاب و ينهشُ لحمها من يروق .. 
كدراجةٍ تنحدر من فوق جبلٍ ولا تعرف نهايتها ..
 و تخشى من حجارة تعوق.. 
 أنانيٌ .. 
رغبت منك النجاة ..
 أردت من شفتاكِ قبلة الحياة ..
 و طمعت لو تصنعي لي مصلا .. 
وتبقى إنسانيتي أصلا ..
 إذ يجري ما أتاني منكِ في الوريد .. 
اعتذر إليكي سيدتي إن كان اعتذاري يفيد ..
 
 مشغولٌ عنكِ ..
 مهمومٌ و همومي رادعة ..
 قد زات من هول المحن ..
 عذراً على كلماتي الموجعة .. 
فهذا خلاصة ذاك الوطن ..
 و تلك ما تبقى لقصيدة رومانسية .. 
بعد ما صنعوا للانحطاط وثن ..
 يعبدونه من دون ضمائرهم ..
 و يتقربون إليه بالقرابين ..
 يهشمون الانسانية التي بداخلهم .. 
و ينشرون الهوان باسم هذا الدين ..
 يزرعون الظلم في كل ارضٍ ..
 وسيحصدون ثورةً ولو بعد حين .. 
 هذا جزاء ما صنعته ايديهم ..
 وهذا مصير الأولين .. 
انظرواإليكِ نهاية من تجبروا ..
 و من تأسدوا .. 
و من رضخ للمتأسدين .. 
ترى النهاية مفزعة ..
و علاماتها ساطعة ..
آتيةٌ لا ريب فيها ..
آتيةٌ تعتذر إليكِ   ..
آتيةٌ تحرر ذاك الوطن ..
فتحضّروا لدفع الثمن ..

الأربعاء، أغسطس 08، 2012

اشتراكيتنا " رؤية الاشتراكيين الثوريين " 

                 الرأسماليين : عايزين رأسمالية أكتر

 

            عن كتاب الاشتراكية التي ندافع عنها - اصدار مركز الدراسات الاشتراكية مارس 2006

 

 رملة بولاق و أبراج ساويرس 






دايما الرأسماليين المصريين بيقولوا أن مشكلة مصر أنها مش دولة رأسمالية بما فيه الكفاية وأنها محتاجة تبقى رأسمالية أكتر عشان مشاكلها تتحل ! و كمان لسة مش كل المصانع و الشركات و الخدمات تم خصخصتهم ، وسيطرة الرأسمالية على كل رأس المال في الدولة ماحصلش لسة .. صبرك شويا .

طبعا لازم نعرف هما بيشتكوا من إيه؟ هما عايزين كل حاجة في الدولة تتباع وتبقى في ايد رجال الاعمال يعني من الاخر تتباع ليهم ، حتى عايزين يشتروا مؤسسات مسئولة عن منتجات و خدمات أساسية وما تبقاش ملك الدولة زي المياة و الكهرباء و الغاز و التليفونات و السكك الحديدية و غيرهم ، عايزين بيع كل الشركات و المصانع العامة بتاعت الحكومة ليهم ، ببساطة هما عايزين يحولوا كل شئ حتى " الناس " نفسهم لمجرد سلعة يبيعوا و يشتروا فيهم بدون اي مشاكل تواجههم أو رقابة أو حتى رفض شعبي .

الفكرة اللي عايزين يقنعونا بيها هي أن السياسة دي اللي اسمها " الليبرالية الجديدة " أو " العولمة " أو " السوق الحر " لو حصلت بشكل أكبر و اتباعت كل الشركات و المصانع و الخدمات العامة ده هيشجع الرأسماليين المصريين و الاجانب  للاستثمار اكتر و الاقتصاد بتاعنا هيبقى قوي و هتقل البطالة و ترتفع الاجور و العيشة في مصر تنتعش ، و منطقهم في كدة أن كل ما الرأسماليين هتزيد فلوسهم أكتر كل ما الفقراء اللي طالع عينهم هتزيد فلوسهم أكتر !

اصحاب المنطق ده هما اللي كانوا مسيطرين على السلطة في مصر في عهد المخلوع و لسه مسيطرين عليها في عهد الاخواني مرسي و مسيطرين على كل سلطة في العالم . حكومات مبارك فضلت تخصص المصانع و الخدمات لعشرات السنين و فضل الدعم اللي كان بيفيد الناس الغلابة يقل نسبيا سنة ورا سنة ، و بدأت الاسعار تتحدد على حسب العرض و الطلب فزادت الاسعار بشكل بشع و طبعا فكرة توظيف الخريجيين في المصالح و المؤسسات الحكومية دي حاجة بقينا بنسمع عنها في الافلام العربي القديمة و التعليم المجاني مابقاش مجاني بأي شكل من الاشكال ارتفعت مصاريفه بسبب انخفاض الدعم وصلت لألاف ده غير ظهور مافيا الدروس الخصوصية و ارتفاع اسعار الكتب المدرسية و الجامعية و ظهور الجامعات الخاصة و المدارس الاجنبية الخاصة اللي بدأت ناس كتير تتوجه ليه وتسيب تعليم الحكومة و طبعا ظهرت المستشفيات الاستثمارية الغالية و غيرهم حاجات كتير ، يعني ببساطة سياسات " السوق الحر " اللي هي كل واحد يعمل اللي هو عايزه بأي شكل و بأي ثمن بغض النظر عن مصالح المجتمع هي اللي بقيت سايدة ،  فيا ترى ايه كانت النتيجة ؟

أكيد كل واحد عايش في البلد يعرف ايه كانت النتيجة ؟ كانت نتيجة ثورة ضد الفساد و الظلم و الاستغلال ، ثورة من أجل العيش و الحرية و العدالة الاجتماعية و الكرامة الانسانية بعد ما الاسعار بقيت نار و البطالة وصلت لأعلى معدلاتها و مستوى الفقر وصل لشكل غير مسبوق ، و نسبة التجار الصغيرين اللي فلسوا وصلت لنسب فلكية ، مشاكل ارهابية و فتن طائفية و استمرت ديكتاتورية مبارك بتقمع و تسجن أي حد ممكن يقرب من مصالح مجموعة صغيرة اوي من الرأسماليين اللي واكلين البلد ولسة لغاية دلوقتي بياكلوها و مرسي طبعا عامل و هيفضل يعمل نفسه مش من هنا لأن اعضاء بارزين في جماعة الاخوان المسلمين هما ناس من اللي واكلين البلد زي مثلا خيرت الشاطر و حسن مالك و غيرهم كتير .

الليبرالية الجديدة و عايزين رأسمالية أكتر عمرها ما كانت الحل عشان تقلل مشكل الناس و تنقذ مريض من الموت ! بالعكس الليبرالية الجديدة كانت سبب في زيادة المصيبة اللي حولة الازمة لكارثة انفجرت في شكل ثورة و برغم كل ده دولة الاخوان لسة ماشية على نفس السياسات اللي الناس خرجت ضدها أيام المخلوع .

في التدوينات الجاية هنتعرف اكتر على شكل الليبرالية الجديدة و سياساتها اللي مصر لسة ماشية عليها .  


  تدوينات لها علاقة بنفس الموضوع : 

  اشتراكيتنا " رؤية الاشتراكيين الثوريين "  الحكام:أنتم السبب في فقركم يا فقراء 

                                                         اضغط هنا

 للتعرف على الاشتراكية الثورية بالعامية المصرية .. الاشتراكية الثورية .. ببساطة  
                                                                  اضغط هنا

   

الاثنين، أغسطس 06، 2012

اشتراكيتنا " رؤية الاشتراكيين الثوريين " 

                 الحكام: أنتم السبب في فقركم يا فقراء

            عن كتاب الاشتراكية التي ندافع عنها - اصدار مركز الدراسات الاشتراكية مارس 2006


دايما رجال السلطة سواء في عهد المخلوع مبارك أو في عهد الاخواني مرسي اللي ماشي على نفس سياسات مبارك الرأسمالية الفاشلة اللي قامت بالأساس ضدها الثورة عندهم رد بسيط جدا على الكساد و الفقر و البؤس اللي الناس عايشين فيه وهو أن الناس دي أصلا جاهلة ومعندهاش وعي عشان كدة بيخلفوا كتير وبيجيبوا عيال مش بيقدروا يصرفوا عليهم وبيسببوا زيادة سكانية بتدمر البلد و مواردها ، و برغم مجهودات الحكومة العظيمة مش بتلاحق على مشاكلهم دي .

التفسير ده مش جديد على فكرة ، فيه عالم اقتصاد مشهور اسمه " توماس مالتوس " قعد طول حياته يدافع عن نظريته اللي بتقول أن السكان بيزيدوا بشكل كبير و الموارد في العالم  كله بتقل ولو سكان العالم ما بطلوش يزيدوا كدة ، هتحصل كوارث و مجاعات !  و طبعا الكلام ده مقنع جدا ، ويمكن تكون انت نفسك اقتنعت بيه و لكن أحب اقولك أن الكلام ده مجرد تدليس و ضحك على العقول .

مفيش شك أن الموارد في مصر وفي العالم كله محدودة بس فيه حاجة كمان موجودة اسمها التكنولوجيا ، والتطور التكنولوجي في العالم وخاصة الدول المتقدمة فاق كل الحدود لدرجة أن باستخدام التكنولوجيا دي فيه دول قدرت تحقق نمو في اقتصادها أكتر بكتير من نموها السكاني ، فلو فرضنا أن النمو السكاني في مصر 3 % - رغم أنه كان في 2005 ما وصلش 2% حتى -  بس خلونا نفترض ، فلو كان نمونا الاقتصادي 10% سنويا أكيد هنقدر نسد احتياجات البشر من أكل و ملبس و مسكن و تعليم و صحة و غيرهم من احتياجات و هيكون كمان فيه فائض .

ولكن عشان يكون فيه اقتصاد بينمو بشكل مستمر و لفترة طويلة في ظل وجود النظام الرأسمالي بكوارثه و انهياراته و هشاشته اللي من سنة للتانية بيحصل بسبب سياساته كارثة تسقط اقتصاد العالم كله فتقريبا مستحيل ده يحصل تماماً .

الدافع الأول في النظام الرأسمالي هو تحقيق الربح للرأسماليين مش تلبية احتياج البشر ، و أي رأسمالي في الدنيا بيشغل فلوسه و بيأنتخ في مكتبه المكيفعشان ياخد فلوس أكتر مش عشان إسعاد البشرية ، و عشان كدة مش هتلاقي الرأسمالي مهتم أوي بأنه ينتج أدوية لعلاج أمراض الكبد عشان فقراء أفريقيا لأتهم مش معاهم فلوس الدواء أو لأنها هتسكبه ملاليم مقارنة باستثمارات أخرى ، ولكن الرأسمالي مهتم جدا في الاستثمار في مجال مستحضرات التجميل بأسعار عالية و ماركات عالمية عشان سيدات الطبقات الغنية في العالم و ده اللي بيسميه الاقتصاديين " الطلب الفعّال " اللي هو الطلب اللي صاحبه يقدر على ثمنه .

الاستماتة من أجل تحقيق الربح بأي شكل من الأشكال هي الصفة المميزة للنظام الرأسمالي لدرجة بتوصل لأن الرأسماليين دايما بيبحثوا عن أي طريقة لتقليل تكاليف الانتاج عشان يزيد عندهم صافي الربح و ده طبعا عمره ما هينفع يحصل غير من خلال استغلال العمال و مص دمهم . الرأسماليين بينفسوا بعض بشراسة لدرجة أنه ممكن يخلي رأسمالي اخر يفلس و يسرح العمال اللي عنده اللي مالهمش أي ذنب ولكن التنافس الوحشي " المطحنة " هو أحد صفات النظام الرأسمالي .و طبعا نتيجة حروب الموت و تكسير العظام للي بين الرأسماليين دي يوميا .. ده بيؤدي بعد تراكمه لانهيارات و كوارث في الاقتصاد العالمي واللي بيقع في النهاية على اكتاف الطبقات الفقيرة اللي قوتها الاقتصادية مش بتتحمل انهيارات قوية زي دي .

و عشان مصر دولة رأسمالية فكل ده بيحصل فيها وهو ده السبب الحقيقي للفقر و البؤس و المعاناة اللي عايش فيها اكتر من نص الشعب و ده كان سبب الازمة الاقتصادية اللي عدت على مصر سنة 1998 لما المستثمرين في العقارات قعدوا يموتوا بعض في السوق و يشوفوا مين هيقدر يبني مدن جديدة و عقارات و ابراج و عمارات فخمة أكتر لغاية ما بقى العرض اكتر بكتير من الطلب و كمان العرض كان أعلى بكتير من القدرة الشرائية اللي عند المحتاجين لمساكن فعلا فحصل ركود و كساد في سوق العقارات و انهيار في المجال ده و المستثمرين فلسوا و ماقدروش يسددوا ديونهم للبنوك فكانت النتيجة أن بعضهم هرب بدون تسديد و التانيين أدعوا تسديد الديون من خلال رشاوي و تزوير مع رؤساء بعض البنوك اللي بعد كدة تم فضحهم في السنين اللي بعدها .

طبعا لازم نكون عارفين أن مصر دولة متأخرة اقتصاديا ، يعني دولة مستهلكة مش منتجة لسة ما وصلش التطور الاقتصادي فيها إى أنها تدخل في حلبة المنافسة الرأسمالية العالمية و ده بيزود علينا المشكلة لأننا مش بنخسر بس و بيحصل عندنا ركود و كساد بيؤدي لفقر ناس كتير ! لأ ، ده احنا كمان بنتأثر بشكل بشع بخسارة اقتصاد دول منتجة و مستثمرة أخرى ، و اقتصادنا لا عارف يتطور ولا عارف يدخل المنافسة العالمية .

و عشان كدة دايما الرأسماليين و اعوانهم من رجال السلطة ممكن يعملوا أي حاجة وحشة و بلا انسانية عشان خاطر بس يقدروا موجودين و واقفين على رجليهم ، أو عشان خاطر بس يقدروا يدخلوا في حلبة المنافسة بدل ما هما بينضربوا من برة و محدش سامع عنهم و ارباحهم مش زي أرباح الشركات العالمية ، و للاسف هما فاكرين انهم كل ما هيطحنوا في العمال أكتر هيكبروا اكتر و يقدروا يوصلوا للمنافسة العالمية  و ده طبعا في ظل فشل الاقتصاد المصري و تراجعه و الانخفاض الشديد للقوة الشرائية أو القدرة على الشراء عن أغلب الناس مستحيل هيحصل ... !!

وحتى لو مصر تطورت و حصل فيها نهضة و بقيت زي الصين أو سنغافورة فالتجربة اثبتت أن دول دي مهما كان نمو اقتصادها سريع و منتعش على طول لفترة طويلة ولكنها ممكن تسقط تماما لو تعرضت لسلسلة من الازمات الاقتصادية العالمية و المحلية ورا بعض و كل اللي حققته الدول دي في عشرات السنين ممكن يسقط  في ثانية واحدة زي ما حصل سنة 1997 أزمة اقتصادية عالمية كادت أن تدمر دول النمور الاسيوية .

و عشان نرجع للي بدأ فيه ، الناس اللي بتقول ان النمو السكاني هو السبب في الازمات الاقتصادية و الاجتماعية و أنه السبب في زيادة معدلات الفقر و انتشار الامراض و الاوبئة و الجهل و ارتفاع نسب البطالة و الأمية و عمالة الاطفال فهما بالتفكير ده تجاهلوا تماما الخلل اللي حاصل في توزيع الموارد بين الناس ، و الاستخدام الخاطئ المتعمد المقصود من الرأسماليين و استهداف التكنولوجيا بس من أجل الربح و لخدمة مصالحهم مش من أجل إسعاد و راحة البشر . فلو احنا بنتكلم عن نظام رأسمالي يعمل بشكل عشوائي و يتحكم فيه مجموعة صغيرة من الرأسماليين اللي بيشغلوه بس عشان مصالحهم الخاصة في تجاهل تام لمصالح المجتمع فالطبيعي أن النتيجة هتكون هي أن الاغنياء هيزيدوا غنى و الفقراء اللي بيتم استغلالهم و ستهلاكهم هيزيدوا فقر .

عارفين إن وزارة الدفاع الامريكية ميزانيتها وصلت لــ 400 مليار دولار سنويا عشان تسليح الجيش و التدريبات و خوض الحروب و قتل الشعوب و غيره ، طب تخيلوا لو المليارات دي كلها كانت بدل ما تتصرف على قتل الناس اتصرفت عشان سد احتياجات الناس و اسعادهم أكيد شكل العالم كان هيكون مختلف عن شكله دلوقتي تماماً ، و طبعا فيه تفسير تاني لفقر الفقراء غير كثره الانجاب و الزيادة السكانية و هو تفسير وقح و قذر دايما يتردد على لسان رجال السلطة و أسيادهم الرأسماليين في كل دول العالم وهو أن الفقراء بيعانوا من الفقر ده بسبب كسلهم و جهلهم وأنهم مش بيحبوا يشتغلوا ، و طبعا ده تفسير غبي لأن الفقراء اللي بيتكلموا عليهم دول وبيقولوا عليهم كسالى هما اللي بيشتغلوا و طالع عينهم عشان يعيشوا هما مليارديرات في مكاتبهم المكيفة و إذا كان على جهلهم أو أميتهم أو عدم حصولهم على قدر جيد و مؤهل من التعليم فده بسبب نظامهم الرأسمالي و سياساته الأنانية الظالمة اللي فشلت في توفير فرص تعليم جيدة لهم و تعمدت تجهيلهم و تسطيح ثقافتهم عشان يبقى سعرهم أرخص لما مايكونوش عارفين حقوقهم .

لسه فيه تفسيرات تانية و حجج تانية كتير بتقولها الطبقة الحاكمة و أنصارها عن أسباب فقر الشعوب هتكون موجودة في التدوينات الجاية . 

 للتعرف على الاشتراكية الثورية بالعامية المصرية ..
                                       الاشتراكية الثورية .. ببساطة


الأربعاء، يونيو 06، 2012

خالد مش سعيد 

 

لما جن الناس يزيد
نحترف قطع الوريد
الانتحار يبقى الخلاص
و ف ملاك النار تقيد
يبقى خالد مش سعيد

لما تبقى الدنيا فانية
و نمشى على نهج الصهاينة
يبقى البنى آدمين مواشى
مات ولا ماماتش ماشى
و الكلاب فى عيشة تانية
نخاف نروح ورا الحديد
يبقى خالد مش سعيد

لما يبقى الرعب وصفة
لما يبقى الظلم حرفة
لما يبقى الجبن حالنا
لو خرجت يبقى مجازفة
لما هنلملم خيالنا
عشان خيال البيه بعيد
يبقى خالد مش سعيد

لما حقى يبقى ضايع
و أبقى حق للضبايع
لما ابقى فى حالى ماشى
و ابقى عرضة لأى صايع
و أن قلت مرة..تخاف تعيد
يبقى خالد مش سعيد

لما يبقى حبيب و عدلى
و الكره و الظلم انوعدلى
و المخبر ابن الكلب واطى
مسلوب رجولته احتياطى
عشان يبين انه راجل
ف كل سكة راح قعدلى
مأمور و عبد للعبيد
يبقى خالد مش سعيد

لما احس إنى جزمة
و إنى عمرى ما كانلى لازمة
و ملمومين عليا صيع
و الضرب نازل بالمعازمة
ويقولوا بركة اهو مات شهيد
يبقى خالد مش سعيد

لما صوتى الانتخابى
يبقى ف مقابل عذابى
لما أكون عايش مسالم
و الموت يكون عضة كلابى
يبقى الحل نظام جديد
عشان يكون خالد سعيد

الاثنين، مايو 07، 2012

مُلهِمَتي 










اشتقت لها فرسمتها
جميلةً تسبح فى عبير الأنهار
و تداعب الطيور بسماتها
تتخاطف الزهور منها الاعطار
و كأنها كنز الوجود للبشر
و المخلوقات جميعها
من جمالها تحتار...


ملهمتى ملاكٌ او جنيةٌ
فهى تفيض بالاسرار
يا ليتنى كنت شاعرا
فوصفها يجملُ الاشعار
و لا يزيد من جمالها شعرا
و لا تحتاج تغزلَ الشعار...


اجلس معها ساعاتٍ
انظر لها اياما
اسمع لها ضحكاتٍ
فتُغير الأحلاما
إن سكتت فتحدثى
لا تتوقفين كلاما
و إن تكلمت لا اسمعها
فالعين تخطف جوارحى
و العين تعشق الاصماما...


فجعلتها تبسمت
و على شفايا بسمتى
مرت يداى على شعرها
غفلت و ضمت لمستى
و تبسمت فى نومها
فنفخت فيها همستى
و كالملاك ضمت جناحيها
و حضنت يديها وردتى
و قد همست و تسمعينى 
ها انتى نمتى حلوتى
فلتصبحين كى اصبح 
فمنكى الصباح حبيبتى
غدا سأكمل ألوانكى
فأنا احبك...رسمَتى