امبارح كان عيد ميلادي .. و انتم طيبين .. كانوا عاملينلي عيد ميلاد صغير كدة .. من ضمن اللي حضروا كانت طنط إيمان صاحبة أمي و ابنها إمام .. و طبعا انا سألتها على سر تسميته " إمام " فعرفت انه متسمي على اسم خاله .. فيها الخير و الله ..و طبعا مقدرتش اسأل عن سبب تسمية خاله بالاسم ده .. ! المهم .. قاعد امبارح في وسط الزيطة و الاغاني و كدة .. لقيت طنط ام إمام عمالة تضحكلي .. فأنا ضحكتلها و مش فاهم فيه ايه .. قلت يمكن عيد ميلادي و كدة .. و هي كمان ست طيبة اوي و بتحبني جدا مش عارف ليه ؟ مع إن علاقاتنا مجرد مناسبات و زيارات خفيفة كدة .. بس كل ما تشوفني بتفرح بيا جدا .. المهم بقى .. مش دي القصة اللي فرحتني .. ! لقيت طنط إيمان جايبة إمام من ايده " جر " .. بتقوله سلم على دكتور احمد قوله كل سنة و انت طيب يا دكتور؟ .. و إمام خجول كدة مني ! مش عارف ليه ! مع إني متابعه و شايفه شقي جدا .. بس لقيته عمال يدور وشه و قافش في جيبة مامته و بيخبي وشه فيها .. فنزلت نص ركبة و قلتله ايه يا امام ؟ سلم عليا .. راح لافف مسلم عليا و كمل اختباء في جيبة مامته .. قعدت اقوله عامل ايه ؟ عندك كام سنة دلوقتي ؟ مش بيرد عليا من كتر الكسوف ! انا قلتلها هو مكسوف مني ليه ؟! كنت حاسس إن الموضع ده فيه " إنة " .. شاكله شقي و مش وش كسوف .. قالتلي طيب اسمع !! و راحت بذلت مجهود كبير عشان تفكه من الجيبة و تخليه يبصلي .. قالتله .. إمام انت قلتلي عايز تطلع زي مين ؟ .. إمام مش بيرد .. ولد يا إمام انت قلتلي ماما انا عايز اطلع زي ميين؟ قوول يا ولد متتكسفش … راح إمام باصص في الارض .. و قعد يلعب في صوابعه شويا و اتنهد و قال .. عايز اطلع زي عمو احمد طلعت ! وراح طالع يجري .. ! هو مش متخيل القنبلة اللي رماها و جرى دي بالنسبالي ايه .. انا من ساعتها فرحان و مصدوم .. و انت كمان اكيد فيه حد شايفك مثل له ! و عايز يطلع زيك ..! ممكن جملة واحدة تغير حياتك .. عشان كدة – و بنصح نفسي قبلكم كلكم – لازم تحسن من نفسك و بجد تحترم فكرة إن الطفل الصغير ده عجينة لسه بتتشكل ! حاول تشارك في تزيين العجينة دي .. و أوعى تشارك في غرس شئ وحش فيها .. حرام بجد .. و عشان كدة انا قررت بجد هأكون قد مسئولية " جملة إمام " و مش هعمل اي حاجة غلط على الأقل قدام اي طفل .. جملة إمام دي كانت بالنسبالي افضل من 100 خطبة لإمام مسجد عن ضلال الشيوعيين و هبل الليبراليين و هطل العلمانيين و كفر البوذيين .. دي رسالة النهاردة .. يا رب تأثر فيك زي ما أثرت فيا ...
و عاش كفاح الاطفال المكسوفين ..
حلوة اوى
ردحذف